Tudeh wi mos seh wahn big big BIG tank yu tu Mista Yacine Coly. Mista Coly tek di taihn (taim) fu rait wi fu taak bowt sohn bifoa-taihn [bifoa-taim] Kriol way fi seh sohn a di wod dehn. Hihn aalso gi wi sohn moa wod wi ku ad eena di Kriol dikshineri, ahn sohn wi need fu chek owt moa. Soh … wi di bigin tudeh day di shyaa wid unu sohn a weh Mista Yacine Coly eemayl wi. TANK YU!
1. Di nayzal song /hn/ fu ad tu moa wod:
Noatis dat wi don put eena di fos edishan a di dikshineri dat wi ga di nayzal song pahn sohn wod (sohn/som; pahn/pan; wahn/wan; ahn/an; hihn; kohn/kom; nayhn/naym; taihn/taim...). Mista Yacine Coly noatis seh dat wi du dis wid lat moa wod dan wi shoa eena di dikshineri. Hihn shyaa:
KRIOL: difrahn (noh jos “difrant”)
INGLISH: different
2. Di bifoa-taihn [bifoa-taim] wod “datira”:
KRIOL: Da datira mek hihn kohn bak soh layt.
INGLISH: It is that which caused him to come back so late.
or > That is why he came back so late.
Memba... yu ku geh yu oan kapi, haad kapi, a di Kriol dikshineri fahn di Nashanal Kriol Kongsl eena Bileez Siti, er da Angelus Press er Brodies er Image Factory eena Bileez Siti er Daker’s Bookstore er Angelus Belmopan Branch eena Belmopan! PLOS: yu ku chek owt di Kriol dikshineri fu FREE ryt ya!
Er if yu noh waahn bada wid di kapi aal a dat dong, jos GOOGLE saach bai di yooz di wod dehn Belize Kriol dictionary online ahn di websait wahn kohn op.
Silvaana Udz, Ed.D da fahn Bileez. If yu waahn tel shee bowt sohnting speshal fu put eena dis Kriol aatikl, eemayl: [email protected] or Vizit: www.nationalkriolcouncil.org