Hapinis fu 2017…Ih Op Tu Yoo!

“Yu si mi kraas! Da how kohn 2017 jos kreep rait op pahn mi rait soh!” Wel, wi hoap da noh yoo di seh dat dis Nyoo Yaaz! Laas week wi mi wish unu Meri Krismos ahn wi mi shyaa sohn a di ting dehn weh oal-taim Bileez peepl doz laik du rong Krismos taim. Tudeh, wi di shyaa sohn a di 2017 Nyoo Yaaz ting dehn wi ku pramis wiself fu du eena di Nyoo Yaa!

 

  1. Noh bex wid noabadi eena 2017 … nobadi!
  2. Eksasaiz moa. Ih noh tek no lata moni. Jos staat waak sohn moa evriday. Klaim dehn step 2-3 taim everi day eena 2017.
  3. Staat evri day eena 2017 di gi tanks tu Faada Gaad, ahn finish evri day di gi tanks tu Faada Gaad.
  4. Kip yu hows kleen, ahn noh ga no lata ting bowt di plays. Ga wahn plays fu evriting. Gi weh dehn lata ting yu noh need ahn weh jos deh bowt di plays di gyada dos.
  5. Werk haad, bot mek shoar yu geh nof res tu: geh nof sleep!
  6. Spen taim wid yu faamli. Mek taim fu dehn, noh jos rong Krismos ahn Nyoo Yaaz. Yu ma ahn pa ahn graama ahn grampa ga lata stoari weh dehn ku shyaa wid yu. Laan bowt yu bakgrong! If yu oanli liv wid yu ma er yu noh ga moch faamli rong, mek taim fu sohn gud fren er nayba tu.

 

Hapi Nyoo Yaa 2017!

 

 

Silvaana Udz, Ed.D da fahn Bileez. If yu waahn tel shee bowt sohnting speshal fu put eena dis Kriol aatikl, eemayl: [email protected] or Vizit: www.nationalkriolcouncil.org

 



Brought to you by the:



Kriol is the language spoken by many Belizeans, especially the Creole people of Belize. Although it is often perceived as a dialect of English, it is indeed it's own language with grammar and spelling rules. The National Kriol Council of Belize was created to promote the culture and language of the Kriol people of Belize, as well as harmony among all the ethnic groups of Belize. Please visit the website of the National Kriol Council of Belize for lots of good information about the Kriol language and the Creole people.


The Kriol Council has been kind enough to send us the weekly "Weh Wi Ga Fi Seh" column that is usually published in the Reporter.


Check back weekly for new articles.


Latest Posts