Chree Moa Ting fu Mek di Nyoo Yaa Gud Gud!

Hapi Nyoo Yaa tu evribadi! Wi staat 2017 wid dis wish fu evribadi: Geh rid a di ting dehn weh di klota op yu laif. Eena wi laas aatikl, wi mi shyaa siks (6) a di ting dehn wi ku aal du fu mek wi laif hapi eena 2017. Dehnya da-mi: (1) Noh beks wid nobadi (2) Eksasaiz moa (3) Gi tanks tu Faada Gaad evriday (4) Kip yu hows kleen (5) Werk haad but geh nof res tu, ahn (6) Spen moa taim wid yu faamli. Bai di way, yu mi noatis seh dat wi mi spel “beks” di rang way eena datdehdeh aatikl? Wi mi spel it az “bex” bot di “x” weh deh eena Inglish da “ks” eena Kriol.

 

Now chek owt dehnya laytis advais weh Ah waahn shyaa wid unu fu mek laif eevn beta eena 2017:

 

  • Geh rid a dehn lata ting dehn weh jos deh bowt di plays. Tink bowt it: Yu reeli need soh moch difrant shooz wen da oanli 3 er 4 a dehn yu reeli laik yooz moas a di taim?
  • Geh rid a peepl weh mek yu di krai op er feel beks op er feel freti freti. Now, wi noh meen yu mos kaaz dehn haam! No! Wi meen yu fu moov yuself frahn dehn. If yu don taiyad a di chrai fu deel wid dehn, bot it jos noh di werk owt, moov aan! Chrai az bes yu tink yu ku chrai, bot moov aan if yu need fu ga pees a main! Ih mait noh soh eezi fu du, bot chrai.
  • Chalinj wahn hapn; haadship kohn lang sayhn way hapinis kohn lang. Di ting fu du da fu ga wahn beta way fu deel wid haadship. Tink a haadship az wahn way fu laan soh dat neks taim wen wahn neks haadship kohn lang, yu handl it beta.

OK! Soh memba dehnya chree ting fu ad tu di nada siks ting wi mi don tel unu bowt eena laas week aatkl. Enjai 2017!


Silvaana Udz, Ed.D da fahn Bileez. If yu waahn tel shee bowt sohnting speshal fu put eena dis Kriol aatikl, eemayl: [email protected] or Vizit: www.nationalkriolcouncil.org



Brought to you by the:



Kriol is the language spoken by many Belizeans, especially the Creole people of Belize. Although it is often perceived as a dialect of English, it is indeed it's own language with grammar and spelling rules. The National Kriol Council of Belize was created to promote the culture and language of the Kriol people of Belize, as well as harmony among all the ethnic groups of Belize. Please visit the website of the National Kriol Council of Belize for lots of good information about the Kriol language and the Creole people.


The Kriol Council has been kind enough to send us the weekly "Weh Wi Ga Fi Seh" column that is usually published in the Reporter.


Check back weekly for new articles.