Ah ku haadli bileev it: Wi don di seh bai bai tu Febiweri ahn di enta di terd mont a di nyoo dekayd! Laad, how taim doz flai; bifoa yu noa it, Eesta wahn deh ya, den Septemba salibrayshanz, den Krismos agen! Fu shoar, wi noh wahn figet di in-bitween kolcha day dehn, laik Aktoaba Pan-Amerikan Day ahn Novemba Garifuna Setlment Day, ahn Nashanal Day Septemba 10. Yes, da fu chroo Septemba 10 don kongk eena di hoal a Septemba salibrayshanz, bot sohn a wi stil laik tek it speshal speshal, laik maybi eevn mek Septemba 9 bee Kriol Day. Sohn tink Septemba 10 shuda bee kaal Nashanal Kriol Day, bot adarels pipl seh dat aal di kolcha benifit fahn di Batl a Sayn Jaajiz Kee-Septemba 10, soh da reeli Nashanal Bileez Day. Stil adarels pipl prifa dat maybi Aagas 1 bee kaal Kriol day sayka dat maak di en a slayvri eena di British sistim. Ahn stil adarels moa pipl prifa Joon 1, di day wen di brayv 14 Flowaz Benk pipl mek disizhan fu stay ahn fait fu Bileez—ahn da dat mi mek di difrans a hoo wee tudeh!
Wel, Ah noh tink wi wahn setl dis diskoshan now. Bot Ah noa seh dat di grayt myoozishan ahn Kriol kolcha laydi, di layt Leela Vernon mi waahn wi ga wahn day weh jos nayhn Kriol Day, ahn shee mi fayva moa Septemba 10, az Ah di memba. Bot maybi shee uda mi gaahn lang wid fos a Aagas. Wel, wi Leela gaahn lang now, 3 yaaz now, Gaad res di ded. Leela Vernon, di kween a Kriol kolcha-wi mis yu! Soh, az Febiweri mont di don, wi memba seh dat da disya mont da di mont eena 2017 dat Leela Vernon mi wayk op ded, wi preshos Leela.
Di Kriol Kongsl gi “nof rispek” tu di layt Leela Vernon, Kween a Kriol Myoozik, fu mi put di Bileez Nashanal Antem tu Kriol. Di antem deh eena English, Garifuna, Spanish, Maya, ahn now eena Kriol! Di Kriol antem mi rikaad bai di layt Leela Vernon, lang wid Emmet Young ahn Henry Martinez III. Fi hyaa it, goh tu dis websait, ahn wi tank Mista Gerry Badillo fi put it op:
https://soundcloud.com/gerrybadillo/leela-vernon-kriol-national