Maach 9 da di day wi aana wi heero dehn ahn pipl weh help owt Bileez big taim. Bifoa, da-mi "Baron Bliss Day." Tudeh day, ih chaynj tu "National Heroes and Benefactors Day." Wid di COVID-19 stil di fling bowt ihself, wi hafu kantinyu fi kyaaful. Soh wi maita hafu salabrayt bai wiself er wid jos famili. Maybi wi ku aal tek taim fi sing di Nashanal Antem, weda wi sing it eena Kriol er Spanish, er Inglish, er Garifuna, er Maiya. Tudeh day, wi shyaa di Nashanal Antem a Bileez eena Kriol weh di kween a Bileez Kriol kolcha put tugeda, di layt Leela Vernon ahn ih breda. Langwij noat: Eena dis verzhan, Leela mi dobl maak di plooral, weh Kriol du sohntaim. Pahn tap, yu ku seh "Karibyan" er "Kyaribeeyan."
O, lan a di free bai di Karibyan See
Wi korij wi plej fi mek yoo free
No tairant kyaahn stay ya; unu enimiz hafu goh
Fahn disya peesful plays a demakrasi.
Di blod a wi ansestaz weh mi bles disya grong
Mi kaaz wee fu free, ahn nohmoh slayv wi wahn bee.
Bai di mait a chroot ahn di grays a Gaad
Mi kaaz wee fu free ahn nohmoh slayv wi wahn bee.
Koaros: Get op – unu disendants a di Baymenz klan
Put aan unu aama ahn difen disya lan
Jraiv bak dehndeh tairant; unu enimiz hafu goh weh
Fahn disya lan a di free bai di Karibyan See.
Naycha mi bles wi wit inof richiz
Wit aal wi mongtinz, valiz ahn raynfares preshos chree
Wi ansestaz, di Baymen, brayv ahn schrang
Put aan unu aama ahn difen disya lan.
Fahn prowd Rio Hondo tu oal Saastoon
Chroo aal dehn koaral ailanz, oava bloo lagoon
Kip wach wid dehn aynjalz, di staarz ahn di moon
Fo freedom wahn kohn sotay tumaaro aftanoon.
(Ripeet Koaros)
YES! Di kween a Bileez Kriol kolcha myoozik, LEELA VERNON lef wi lata ting fu mek wi prowd a wi Kriol kolcha! Nof rispek tu Laydi Leela ahn tu ih faamli. Gaad bles. Langwij noat: Eena dis verzhan, Leela mi dobl maak di plooral, weh Kriol peepl du sohntaim.