Joon... wedn mont (Wel, yu ku marid eni mont a di yaa... di ting dehnya dayz da fi mek shoar yu stay marid!). Pahn tap, Joon da arikayn mont! Hat weda mont di staat op! Plos Joon da migl a di yaa mont! Ahn noh fi menshan grajuyayshan mont! Wi welkom Joon. Tudeh, wi di shyaa wid unu sohn a di egzampl sentens dehn wid di wod "welkom" eena dehn. Dehnya da fahn di Kriol-Inglish dikshineri.
Dehn balahu uman noh wahn welkom eena mai famili.
Those loud women won't be welcome in my family.
Shoar, yu welkom da mi hows.
Sure, you're welcome at my house.
Wi mos welkom Mariyan Joanz wen ih kohn da Bileez.
We need to welcome Marion Jones when she comes to Belize.
[Pahn tap, tudeh day, wi welkom Simone Biles ahn di baksa man Jarrell Miller: Also, these days, we welcome Simone Biles and the boxer Jarrell Miller.]
Wi mi ga wahn welkom paati fi mi ma wen ih kohn fahn Stayts.
We had a welcoming party for my mother when she came from the States.
Big big kangrats tu enibadi weh di geh marid dis Joon 2021, ahn big big kangrats tu enibadi weh di grajuyayt dis Joon 2021. Nof rispek!