Wi don deh da migl mont a Janiweri 2022. Disemba mi en op wid wahn big laas fi wi. Wi preshos Myrna Manzanares gaahn bak tu Faada Gaad. Ih spirit now deh wid Leela Vernon, Mista Peetaz, Mista Percy Reynolds, Aanarabl Philip Goldson, Ruby Marriot Perriot, Rosalie T. Staines (Oapn Paki) ahn aal di ada pipl weh mi help kip op Kriol kolcha joorin dehn taihn pahn Mada Ert. Soh, weh wi ku aal laan wen wi hafu seh gudbai tu wi preshos pipl? Dis da di laif lesn dehn mee di laan moa ahn moa evritaihn Faada Gaad kaal bak hoahn wan a mi pipl dehn:
Fain hapinis eena lee evriday ting.
Ih ku oanli haad haad haad fi du dis sohntain, speshali wid disya jratid koroanavairos. Sohn a wi ga moni ahn helt woriz. Pahn tap, sohn a wi famili ahn faamli di geh sik ahn sohn di wayk op ded. Mee tink seh evribadi noa sohnbadi weh don kech di vairos, er noa sohnbadi weh di vairos tek weh.
Eet helti ahn moov yu badi.
Mek wi eet moa helti ting. Pahn tap a dat, wi need fi geh lee eksasaiz. Yu ku eevn eksasaiz az yu di kleen! Wi don noa seh dat disya jratid koroanavairos lov atak pipl wid presha ahn shuga. Soh eet gud ahn lee eksasaiz gud fi aal a wi.
Tank Faada Gaad evriday.
Tank Faad Gaad fi si dis day ahn evriday. Nof pipl wi noa di wayk op ded dehnya dayz. Sohn seh dis vairos di tek weh pipl bifoa dehn taihn. Bot maybi dis da dehn taihn eniway. Mi layt pa doz ga wahn ting ih doz seh: Eena Inglish da dis: My days were limited before they existed.” Eena Kriol, mee uda chranslayt dis laik: Wen Ah fi wayk op ded mi don set bifoa Ah mi eevn baan.