Septemba... Rimemba!

Septemba 2020 da wan weh wi noh wahn figet fu chroo! Yes, wi di maak 222 yaaz sins di Batl a Sayhn Jaajiz Kee. Yes, wi di maak 39 yaaz sins Bileez Indipendans.


Bot dis Septemba 2020, wi di salibrayt eezi eezi wan eena wi haat. Koroanavairos deh rong, so wi hafu stay schrang, ahn kip Bileez schrang. Wi maita kyaahn di goh bowt disya Septemba di daans bowt da paati ahn ga schreet paati ahn di salibrayt op laik how wi doz waahn. Bot wi ku du wahn lee brokdong ahn punta ahn marimba ahn bolayro ahn play pahn mowt aagan eena wi oan lee hows, kaaz memba seh: Notn deh weh wi kyaahn difeet wans wi aal daans tu di sayhn beet! Soh tugeda mek wi lisn tu weh di govament ahn di Minischri a Helt advaiz wi bowt di koroanavairos. Ahn memba seh dat langsaid di koroanavairos, wi stil deh eena harikayn seezn! Bot memba seh: Rayn er shain, Bileez stil fain at 39.


Soh, dis Septemba 2020, du yu lee daans ron yu oan hows di salibrayt Bileez eena yu haat. Memba aalwayz dat Bileez da fi yoo ahn Bileez da fi mee. Ahn wans koroanvairos don, Bileez da fi di tooris 222. Wid 222 yaaz sins di Batl a Sayhn Jaajiz Kee, ahn wid 39 yaaz a Indipendans, Bileez ga schrang bakboan fu chroo!

Stay sayf dis Septemba, Bileez!


Download PDF


Brought to you by the:



Kriol is the language spoken by many Belizeans, especially the Creole people of Belize. Although it is often perceived as a dialect of English, it is indeed it's own language with grammar and spelling rules. The National Kriol Council of Belize was created to promote the culture and language of the Kriol people of Belize, as well as harmony among all the ethnic groups of Belize. Please visit the website of the National Kriol Council of Belize for lots of good information about the Kriol language and the Creole people.


The Kriol Council has been kind enough to send us the weekly "Weh Wi Ga Fi Seh" column that is usually published in the Reporter.


Check back weekly for new articles.


Latest Posts