Mek wi big op Mista Pedro Sanchez, fahn Vista del Mar, fi tel wi bowt disya saaf kyandl.
Evri now ahn den, yu maita geh wahn lee scrach er kot pahn yu han er fut. Maybi yu mi-di chap yaad, er chrim yu flamboayant chree. Er yu gaahn gaahn geh wahn noni aafa di noni chree fi mek noni joos, sayka yu chravl wid yu mosl ayk dehn ahn lee bak problem – ahn noh mek wi taak bowt presha ahn shuga!
Er maybi yu ga wahn lee bon spat pahn yu han, sayka yu mi-di kuk op sohn nais nais bail op er schoo pigtayl (Laad, ih haad fi fain pigtayl sohntaihn dehnya paas fyoo dayz!), er sohn deh-aan hudut weh mek fahn scrach! Fi eni lee woon er kot, dis da yu karek karek kyoar. Da Mista Pedro Sanchez tel wi bowt dis:
Rob op lee saaf kyandl eena eni kain a ail (sweet ail, kuknat ail, baybi ail...) sotay yu geh wahn lee payst. Put dis pahn di lee woon.
Toch op now ahn den. Afta bowt 2-3 dayz, datideh saaf kyandl don haal owt aal di moischa. Ih jrai it rait op. Bamsideh! Yu don heel.
Da bowt faiv dalaz da eni jrogstoar fi di saaf kyandl.