Joon mont da taihn wen grajuyayshan hapm, sohntaihn bai en a May mont. Fi 2020 ahn 2021, noh moch mi hapm wid di yoozhal pram, sayk a Covid-19. Pram, wi noa, da di big nait owt wid dayt fi dehn bwai ahn gyal weh grajuyayt fahn hai skool. Mee memba fi mee dayz, way way bak eena di 1970s wen mee mi grajuyayt fahn hai skool. Wahn big ting dehndeh taihn da-mi fi goh lain op fi wach dehn bwai ahn gyal goh da big hotel fi salabrayt dehn pram. Dehn gyal doz jres op ahn put een priti prit hyaadoo, ahn di bwai dehn mi deh eena soot, sohn fi di fos taihn eena dehn laif. Ahn lat a dehn jichri ahn jompi, pahn dehn fos dayt, di swet no pus bak fut!
Wel, now eena 2022, sins wi ga vakseen ahn di laan fi liv wid di koroanavairos, pram kohn bak fi sohn a dehn hai skool! Bot, ges wat? Eena 2020 ahn 2021, wen dehn bwai ahn gyal mi eena sekan, terd, ahn foat faam, wi mi deh laik anda wahn lee lakdong. Klaas mi deh aanlain, ahn no spoat ivent ahn lee dis ahn dat hai skool paati mi deh... soh, yu ku andastan, noh moch chaans mi deh fi dehn yong bwai ahn gyal meet op ahn geh fi noa eech ada. Miks man! Soh, now, eena 2022, weh dehn wahn geh dayt fi kehr da pram? Sohn yong gyal mee noa weh grajuyayt fahn hai skool disaid seh dat dehn noh mi wahn chrai luk rong fi fain owt how di hek fi fain dayt fi kehr da pram. Insted, dehn skip di faamal pram paat ahn jos gaahn da wahn 'pram afta paati'... ahn dehn gaahn tugeda az wahn groop, laik sebm fren. Dehn daans op wid eech ada ahn mi ga fon fon fon, eevn wid no dayt!
Tu aal dehn yong bwai ahn gyal weh grajuyayt fahn hai skool eena 2020, 2021, ahn 2022: Kangrats ahn wi wish unu aal di bes eena unu laif!