Mesij fi Krismos eena 2021: Gi Tanks Evriday

Wel, ih noh luk laik di koroanavairos wahn goh weh enitaihn soon—at lees noh bifoa dis 2021 don fu shoar shoar shoar. Da nof bizniz sofa. Da nof werkaz sofa. Da nof Bileezyan don sofa ahn stil di sofa. Noabadi deh weh noh feel sohn toch a Covid. Fi sohn a wi, wi laas wahn famili memba, er faamli, er fren. Ahn wi nat eevn kuda mi dehn nyaa dehn wen dehn wayk op ded, Gaad bles. Wi pik op wiself ahn chrai wi bes fi kehri aan. Fi ada wan a wi, wi laas wi jab. Maybi wi jab had woz tu let wi goh, er kot wi salari. Agen, wi pik op wiself, ahn wi chrai wi bes fi goh lang. Sohn a wi staat chrai mek wi moni soh nada way, laik mi fren weh mek gud gud frai jak: Shee staat mek it fi sel, jos di flowa weh don miks, redi fi yu bai ahn schrech owt ahn frai op. Dat kuda mi haadli help ahn owt, bot evri lee bit weh ih mi manij fi sel mi beta dahn notn.


Soh, now, wi di wach Krismos 2021 di kohn. Lat a wi don geh wi vakseen, ahn sohn a wi don geh boosta shat. Wi kantinyu pray seh dehn wan weh noh waahn tek di vakseen geh di sens fi tek it. Pahn tap a aal a dis, nyoo kain a Covid-19 kip di staat op. Faada Gaad, wi pray: Help Bileez, help di werl. Wi gi tanks tu wi ners dehn, ahn wi dakta dehn, ahn tu aal hoo werk da haaspital ahn da klinik, ahn eena servis laik pik op gyaabij, er stak op di shap dehn soh mek wi ku bai lee food, haad az wi fain it fi put tugeda di moni sohntaihn.


Gi Tanks. Pray fi Bileez. Pray fi di Werl.


Tingz noh eezi. Covid-19 luk laik notn ku nak it dong. Bot di werl gaahn chroo dis ahn moa bifoa. Soh, noh figet fi prayz Faada Gaad: Jeezas da di reezn fi di seezn a Krismos. It maita haad haad sohntain fi gi tanks tu Faada Gaad. Wi waahn kweschan: Wai? Wai? Wai Gaad noh mek dis Covid goh weh? Now wi mos aalso aks: Weh moa eech a wi ku du fi help dis Covid goh weh?





Brought to you by the:



Kriol is the language spoken by many Belizeans, especially the Creole people of Belize. Although it is often perceived as a dialect of English, it is indeed it's own language with grammar and spelling rules. The National Kriol Council of Belize was created to promote the culture and language of the Kriol people of Belize, as well as harmony among all the ethnic groups of Belize. Please visit the website of the National Kriol Council of Belize for lots of good information about the Kriol language and the Creole people.


The Kriol Council has been kind enough to send us the weekly "Weh Wi Ga Fi Seh" column that is usually published in the Reporter.


Check back weekly for new articles.