May 9 wi don noa seh da di Sondeh wen Madaz Day jrap dis yaa 2021 eena Bileez. Eena Bileez ahn aal oava di werl, wi salabrayt wi ma. Sohn konchri laik wee ahn di USA salabrayt Madaz Day yoozhali di sekan Sondeh eena May mont. Ada konchri salabrayt Madaz Day di 4 t Sondeh eena May mont. Eena fi wee paat a di werl, wi tink a May 10 t az di yoozhal day fi Madaz Day, bot wi salabrayt it di Sondeh kloasis tu May 10.
Maybi yoo seh ma, er mama, er mami, er sohnting els fi kaal yu ma. Mee ahn mi sista dehn ahn mi breda kaal fi wee wan "mami" bot fi mee daata kaal mee "ma." Wateva yoo kaal yu ma, memba fi kaal yu ma fi Madaz Day! Beta yet, noh wayt fi Madaz Day fi kaal yu preshos ma... toch bays wid yu ma nof taim aal yaa rong. Pahn Madaz Day, wi tek taim fi chreet wi ma speshal. Wi noa seh dat aal yaa rong, wi bizniz fi chreet mama speshal. Bot pahn May 9 dis yaa, wi salabrayt wi mama wid Madaz Day. Maybi wi kuk fi mama, maybi wi tek wi ma owt fi eet (eena 2021, dis pen pan how di koroanavairos roolz stay eena May), maybi wi bai mami wahn nais nais bonch a roaziz er ada flowaz, er wahn nais nais prezent. Wateva wi du, wi chrai shoa mami, pahn dis day set asaid fi aana wi ma—ahn wi graama tu—how moch wi lov dehn.
Sayka how da yu ma baan yu, lov op yu ma tu di nohmoh nohmoh. Sohn a wi ga wahn ma weh neva baan wi, bot hoo rayz wi laik wahn mama. Shee da yu ma fi aana tudeh tu. Now, maybi sohnbadi maita ga wahn big er lee beef wid dehn ma bowt sohnting. Memba seh dat laif shaat (eevn shaata eena dehnya taim wid koroanavarios ahn ada tingz!). Soh how bowt dis aidyaa: Chrai si if yu ku mek op wid yu ma if yu di ga lee ishyu wid ahn. Chrai taak tu ahn, ahn unu chrai reech wahn andastandin.
Hapi Madaz Day 2021