How Yu Krismos 2021 di Luk?

Weh Krismos 2021 di luk laik fi yoo, yu famili, ahn yu faamli?

"famili" eena Kriol:

Dis rifa tu yu ma, pa, breda, sista, graama, granpa—weh Inglish seh az yu "immediate family."

"faamli" eena Kriol:

Dis rifa tu yu kozn (fos, sekan, er moa), yu onkl, aahnti—weh Inglish kaal yu "extended family."


Ih haad fi tink agen laik bifoa Covid-19. Hoo ku tink bowt put een nyoo maali? Fos ting, moni tait tait. Sohn a wi bayli di goh lang, laas wi jab er ga kot salari. Ahn disya COVID di stik rong laik bloo konkas. Ih jos noh waahn goh weh. Ih kip di weel ahn ton agen. Delta, Omicron... weh neks? How wi ku tink a palish op wi priti boad fernicha! Ahn sohn a wi maita waahn paynt op di plays fu Krismos laik wi doz du bifoa dis COVID staat op ahn tek wi lee moni. Bot wi jos kyaahn du it dis yaa.


Lat a wi di sata hoahn, ahn da noh jos sayk a kerfyoo. Wi jos nat eevn ga di feelin fi di goh owt ahn bowt di plays. Ahn noh jos sayk a wi moni tait tait dis yaa. Maybi di yonga pipl waahn. Bot mee ahn lat a mi fren dehn wen don oava 60 yaaz oal jos waahn dehn wid famili, ahn if pasibl, wid faamli. Maybi di bes gif wi ku gi dis Krismos da jos fi tel wi famili ahn faamli dehnya spesha wod dehn:

Ah lov yu, mi famili. Ah lov yu mi faamli.




Brought to you by the:



Kriol is the language spoken by many Belizeans, especially the Creole people of Belize. Although it is often perceived as a dialect of English, it is indeed it's own language with grammar and spelling rules. The National Kriol Council of Belize was created to promote the culture and language of the Kriol people of Belize, as well as harmony among all the ethnic groups of Belize. Please visit the website of the National Kriol Council of Belize for lots of good information about the Kriol language and the Creole people.


The Kriol Council has been kind enough to send us the weekly "Weh Wi Ga Fi Seh" column that is usually published in the Reporter.


Check back weekly for new articles.