Di laas too yaaz feel laik aal a di harikayn wi eva mi ga, aal roal intu wan big wan. Di difrans da dat disya harikayn da wahn vairos. Ahn evritaihn wi tink seh disya Harikayn Vairos di don, ih weel ahn ton agen. Wi taiyad a du dis; wi taiyad a du dat. Alpha, Delta, Omicron... da sotay wi reech Omega wi wahn don?
Soh, weh fi du? Mee mi-di aks wahn lee oal laydi weh fi du fi kip op mi spirit, fi wayk op evriday widowtn di feel laik di werl di en. Dis lee laydi fren eena ih 90s. Shee liv chroo aal kain a ting. Da gud wail now ih don beri ih hozban. Pahn tap, chree a ih pikni gaahn lang tu. Shee haadli ga eni moni. Ih liv pahn lee soashal moni, ahn weh ih too daata ahn granpikni di help ahn wid. (Bot chree a dehn di schrogl bad tu, sayk a dehn lee torizm bizniz gaahn een wid disya jratid vairos.)
Soh how fi welkom 2022? Wen 2021 mi enta, wi mi seh, "Oakay, disya nyoo yaa mosi wahn beta dan laas yaa. Ahn, yes, wi geh vakseen, now boosta. Noh main seh sohn pipl eena Bileez stil noh waahn tek di vakseen. Unu pleez pleez tek di vakseen. Sohn adarels plays eena di werl nat eevn ga nof vakseen fi everibadi.
Wel, mi lee oal laydi fren gi mi dis mesij, weh Ah di shyaa wid unu tudeh, dis fos week fi 2022. Ih tel mi seh, "Neva giv op hoap, pet. Hoap da weh wahn mek yu stap chravl wid yu nervz." Ah lisn tu ahn, den Ah tel ahn seh Ah mi tink yu wahn tel mi fi bileev eena Faada Gaad... pray. Mi fren smail wahn saaf smail ahn ansa seh, "Pet, dat don kova. Da sayk a Faada Gaad grays wi ku ga hoap. Soh noh bada jres op eena yu saroz eena 2022. Evriday da wahn nyoo day, wid nyoo hoap.
Jres Yuself eena Hoap eena 2022.