Wi don noa seh dat Septemba mont da taihn fi salabrayt Septemba 10 ahn wi Indipendans Day pahn Septemba 21. Bot non a dis maita mi neva hapm if da neva sayk a di brayv 14* pipl fahn Flowaz Benk. Di big ting bowt di Septemba 10 1798 fait da dis: Da-mi sayk a di disizhan pahn Joon 1, 1797, di fait fi Bileez (di Setlment...British Handooras...Bileez) mi hapm. Bak eena 1797 wen di meetn mi staat, sohn nayhn mi misn wen dehn tek roal kaal. Bot bai di en a di meetn, dehn mi dehdeh, soh da dats mek 65 voat fi difen di Setlment ahn 51 fi noh difen... wahn difrans a 14 voat. Den, lee moa dan wan yaa layta, eena 1798, bam si deh... wi kip di Bileez wi kohn fi noa tudeh day! Ih soh gud gud fi si how Bileez tudeh day big op di Flowaz Benk/Bileez Riva Vali pipl hoo mek it hapm!
Dis yaa, 2022, dehn had woz fi mi push bak di Flowaz Benk salabrayshan tu Joon 11 sayka bad weda. Stil, pahn Joon 1, di Flowaz Benk "Sunrise and Libation Ceremony" mi stil hapm. Dis mek 8 yaaz now dat hapm. Big op Abigail McKay, Flowaz Benk vilij kongsl, ahn adaz! Moas a di 14 pipl da-mi fahn di Bileez Riva Vali. Plos, di hischri man, Mista Nigel Encalada, diskova eena di Bileez Aakaivz dat da-mi 15* pipl, bot da 14 voat dehn mi need, soh tudeh day wi taak bowt di Flowaz Benk 14. Tudeh, wi print di nayhn dehnya brayv pipl:
| William Flowers | | Caesar Flowers | | Joseph Toney |
| Adam Flowers | | William Scott | | William Pindar |
| George Grant | | James Hercules | | William Crofts |
| Dan Dawson | | John Dawson George | | Raybone |
| Thomas Robertson | | Joseph Smith | | *Thomas Flowers (#15) |
Injai Flowaz Benk, Joon 11 dis yaa (sayka bad weda push bak di big salabrayshan weh mi fi deh erliya eena Joon)