Yu eva wanda wai Eesta dayt chaynj op evri yaa? No wan fiks taihn deh fi ga Eesta Sondeh. Soh, pahn tap, Hoali Terzdeh, Gud Fraideh, ahn Eesta Mondeh dayt chaynj op evri yaa tu. Bot, mataz bee, Eesta Sondeh day aalwayz jrap bitween Maach 22 ahn Aypril 25. Now, dat da wahn hoal mont a difrans!
Wan lee infamayshan mee fain owt pahnlain, pahn di "Farmer's Almanac" da dis: Oava wahn taim di schrech 500 yaaz, fahn back eena 1600 di goh op tu 2099 (weh noh kohn yet), di 2 moas kaman taim fi salabrayt Eesta Sondeh da Maach 31 er Aypril 16.
Wel, disya yaa, eena 2021, Eesta Sondeh jrap pahn Aypril 4. Eesta taim goh wid di fos ful moon a Spring taim. Now, eena Bileez, wee noh taak bowt di 4 seezn laik adarels plays, yu noa: Winta, Spring, Soma, ahn Faal. Wee jos taak bowt rayni seezn er jrai seezn! Bot wi aal ga aidyaa dat Spring taim kohn eena Maach, Aypril taim.
Mee memba seh dat wen mee da-mi lee gyal, mi ma doz jres op aal a wee pikni eena wi nais nais Eesta dandan fi goh cherch. Soh, tudeh day, eena dehnya koroanavairos taim weh di gat wi di meet op eena smaal groop, wi waahn seh Hapi Eesta tu aal. Pahn tap, weda yoo aten Maas pahnlain er eena persn wid yu choch breda ahn sista dehn, memba dat Jeezas da di reezn fi di seezn.
Soh tel me: Yoo tink yu wahn deh rong fi Eesta wen 2099 kohn rong?
Sayf ahn Hapi Eesta 2021 tu aal a unu!