Di Resipee fi wahn Gud Laif

Weh Yu Need

½ a wahn big haat ful a lov                                 ½  a wahn big haat wid no hayt

½ a wahn brayn weh laik tink                              ½  a wahn brayn weh laik jreem

365 dayz a gi tanks tu Faada Gaad                    52 weeks a prayz tu Faada Gaad

1 big big smail evri day                                       Nof lee smail evri day

10 minitz di meditayt evri maanin                     10 minitz di meditayt evri nait

30 minitz di waak evri day*                                 * er 150 minitz di waak evri week

3 helti meelz evri day*                                        * er 5 tu 7 smaal helti eetn evri day

7 tu 9 owaz sleep evri nait                                  1 gud haliday evri yaa 


How fi mek it

 Saafn yu haat wid lov wen yu di tink bad ting bowt ada pipl. Flayva evri day wid
wahn smail ahn heloa tu yu fren, faamli, kompni, ahn hoo yu bok op pahn di
schreet. Seezn yu main wid wahn lee nyoo nalij evri day … er evri week at lees!
Pahn tap a aal dat, mek shoar shoar yu gi tanks tu Faada Gaad evri day. Tank
Faada Gaad wen yu wayk op ahn bifoa yu goh sleep da nait.

 

*Bowt eksasaiz ahn food 

Memba weh aal di noochrishanis dehn tel wi: Noh mata humoch yu eksasaiz, yu
kyaahn eksasaiz weh lata lata lata food! Soh, noh di stof op yu beli wid lata food,
wen yu noa seh yu don ful. Plos, chrai kot bak pahn aal da shuga ahn proases
food. Wi taiyad a hyaa dat dehnya ting noh gud fi wi, yet nof a wi stil kehr aan di
stof op wiself wid lata shuga ting ahn proases food! Stap it!

                           Now Yu Noa How fi Enjai Laif:

                 Noh Schres, Eet Helti, Eksasaiz, Res Op, ahn Gi Tanks

 

Silvaana Udz, Ed.D da fahn Bileez. If yu waahn tel shee bowt sohnting speshal fu put eena dis Kriol
aatikl, eemayl: [email protected]          Vizit: www.nationalkriolcouncil.org



Brought to you by the:



Kriol is the language spoken by many Belizeans, especially the Creole people of Belize. Although it is often perceived as a dialect of English, it is indeed it's own language with grammar and spelling rules. The National Kriol Council of Belize was created to promote the culture and language of the Kriol people of Belize, as well as harmony among all the ethnic groups of Belize. Please visit the website of the National Kriol Council of Belize for lots of good information about the Kriol language and the Creole people.


The Kriol Council has been kind enough to send us the weekly "Weh Wi Ga Fi Seh" column that is usually published in the Reporter.


Check back weekly for new articles.