Blak Hischri Mont: Yu mi noa seh da mi wahn blak man weh invent di spaak plog?
Evri yaa, Febiweri mont salabrayt az Blak Hischri Mont. Tudeh day, wi don deh nayli da en a dis mont. Maybi yoo mi aten sohnting bowt Blak Hischri Mont, maybi eena Bileez, er aanlain, er da faren. Di Nashanal Kriol Kongsl, langsaid di Bileez Hischri Asoasiyayshan, di aana di layt Myrna Manzanares evri mont aanlain pahn di 21 a evri mont, di day Mis Myrna mi wayk op ded. Pahn Febiweri 21, wan a di ting weh mi du da-mi fi shyaa bowt Blak Hischri Mont, ahn shyaa sohnting weh Mis Myrna mi seh bowt dis. If yu waahn tek paat eena di Maach wan, er jos jain een fi lisn, yu ku eemayl [email protected] fi moa infamayshan. Tudeh day, wi waahn shyaa sohn a di Kriol wod dehn weh kohn fahn Afrikan langwij. Dis way, wi ku si how wi priti prit Kriol langwij salabrayt Blak hischri evri taihn wi yooz dehnya wod. Sohn a dehn da:
| Kriol Wod |
|
Inglish Meenin |
|
Afrikan Langwij fi di Wod |
gumbeh
okro
kunku
cho!
Anansi
bubuman
|
|
a Kriol drum
a type of vegetable
very small, tiny
An interjection
a folklore spider character
boogieman
|
|
Kikoongo (Kikongo)
Ibo (Igbo)
Yoruba
Ewe
Twi
Kikoongo
|
Eena di Kriol-Inglish Dikshineri, wen wi ga nalij a weh di wod kohn fram, wi put it een. Sir Colville Young da wan a di pipl dehn weh mi chrays lat a dehnya wod. Memba seh da-mi Sir Colville Young , az Dakta Colville, hoo mi du wan a di fos stodi a di Bileez Kriol langwij, bak eena 1973. Wahn neks risaacha, di layt John Holm, mi chrays lat a dehnya wod tu. Wan egzampl a wan a di enchri dehn eena di Kriol-Inglish dikshineri da:
bubuman (var:
bukuman)
n. boogieman.
Noh stay owt deh layt kaaz bubuman gwehn wid yu.
Don't stay out there late because the boogieman will get you.
See: bagabu, bubu, goas.