Bileez Kriol Wiki…ih redi! Wel, wi hoap no lee Kriol spelin mistayk deh pahn it stil, sayka noh mata how wi chek, wi fain wan er too eech taim. Plos, sayka da wahn Wiki sait, enibadi ku goh een ahn edit ahn ad neks ting. Di nayhn a di websait da: Bileez Kriol Wiki
Ahn di websait ajres da: https://bzj.miraheze.org/wiki/Main_Page
Di Nashanal Kriol Kongsl gi nof tanks tu Mista Vicente Costalago fi kohn op wid dis aidyaa bowt 3 yaaz abak, ahn wi tank hihn fi staat it op ahn put it tugeda az wi mi werk langsaid hihn di chranslayt fahn di Inglish Bileez Wiki websait tu di Kriol wan. Wel, da jos wahn baysik Bileez Kriol Wiki fi now, ahn wi welkom unu fi ad tu it: Jos PLEEZ, chrai yu bes fi rait eena di karek karek Kriol spelin! Wi tank unu. Er jos yooz it az wahn way fi laan fi reed ahn rait Kriol er fi taak bowt Bileez eena Kriol, speshali wen yu waahn yooz Kriol eena wahn ofishal setn.
Egzampl a di infamayshan weh dedeh:
Enaji eena Bileez bays pahn foa mayn ting: farin fasil fyoowil, baiyomaas, haijro, ahn korant fahn abraad. (Energy in Belize is based on four main sources: imported fossil fuels, biomass, hydro, and imported electricity.)
Di Bileez dala da di ofishal moni eena Bileez (di korensi koad da BZD). Di dala sain $ da di yoozhal way fi shaatn it, er aalso BZ$ soh mek ih stan owt fahn ada dala-kain a moni. Di Bileez dala divaid intu 100 sens. Di ofishal valyu fiks az 2 BZ$ = 1 US$. (The Belize dollar is the official currency in Belize (currency code BZD). It is normally abbreviated with the dollar sign $, or alternatively BZ$ to distinguish it from other dollar-denominated currencies.It is divided into 100 cents. The official value is pegged at 2 BZ$ = 1 US$.)