Di moa yu eet, di moa yu _ _ _ _!
Weh Yu Need
½ pong red beenz 1 teespoon seezn saal
½ teespoon blak pepa 1 teespoon taim
3 plog gyaalik 1 meedyom oanyan
1 meedyom sweet pepa ½ teespoon oregano leef
1 pong pitayta 1 pong koako
¼ smaal kyabij 1 pong yaamz
1 meedyom karats 2 tayblspoon kuknat ail (if yu waahn)
milk fahn wan kuknat
How fi mek it
Saafn di beenz eena wahn krak pat er rait soh pahn di stoav. Dais op aala di
vejitablz eena wahn saparayt pat, ad een inof waata fi kova dehn ahn bail dehn
til dehn saaf. Ad een di saafn beenz, ahn di ail, di kuknat milk, ahn di seeznin
dehn, ahn ad een di domplin* dehn. Seezn di soop tu how yu laik it.
*How fi mek Domplin:
2 kop flowa 3/4 teespoon baykin poada
3/4 teespoon saal 1/3 kop waata
Put aala yu jrai ingreedyens eena wahn bowl ahn miks it op gud. Ad een di waata
lee bit bai lee bit ahn miks it op fi mek wahn stif doa. Flatn owt di doa ahn kot it
eena skwyaaz er eni shayp weh yu waahn.
Hoap yu injai yu beenz soop!
Silvaana Udz, Ed.D da fahn Bileez. If yu waahn tel shee bowt sohnting speshal fu put eena dis Kriol
aatikl, eemayl: [email protected] Vizit: www.nationalkriolcouncil.org