Di ada day Ah mi-di taak wid wan a mi fren dehn bowt how wi don deh da Aktoaba. Yes! Oanli too moa mont den Krismos deh ya! Da soh sohn a mi fren dehn konkdong tu Krismos. Fi mi fren dehn wid Stayts kanekshan, dehn tink a Aktoaba laik konkdong fi wahn big Stayts kain a Tanksgivin terki dina! (Wel, mee da krofi chroo ahn chroo. Miself, mee noh salibrayt Stayts Tanksgivin, BOT mee goh nyam op mi fren dehn terki dina!) Fi mee, da Krismos konkdong bigin now eena Aktoaba.
Mi fren aks mi wahn inchrestin kweschan bowt if Ah wahn put op Krismos chree ahn ting fi Disemba (Shee put her wan op fahn migl a Novemba). Ah tel ahn seh mee noh noa yet, sayka mi daata deh weh fahn hoahn dis yaa. Shee den tel mee fi shee plan. Chek it owt: Shee plan fi REED di KRIOL BAIBL dis yaa evri day fahn Aktoaba fos tu Krismos Day! Madaz! Wat a gud gud aidyaa! Plos yu ku reed ahn lisn tu di Baibl (Nyoo Testiment) eena Kriol fu free! Vizit ya:
https://www.bible.com/versions/409-bzjnt-di-nyoo-testiment-eena-bileez-kriol
Da-mi afta moa dan ten yaaz a werk fi poblish di Nyoo Testament eena Kriol, eena Maach 2013. Da mi-di di Kriol langwij groop ahn Baibl groop a di Nashanal Kriol Kongsl, ahn lat a ada pipl. Wycliffe Baibl groop ahn SIL Lingwistiks groop mi help mek dis hapn, wid nof help fahn Paul ahn Cindy Crosbie, ahn nof help bifoa dat fahn Ken ahn Sandy Decker ahn Naomi Glock. Pahn tap, nof Bileezyan paasta ahn choch pipl help fi mek dis hapn. Gaad bles! Now, tek wahn minit fi prayz Faada Gaad fi evriting yu ku tink bowt fi gi tanks fa!
Tank yu, Faada Gaad, fi dis day weh Yoo mek. Tudeh mee aana yu preshos naym, Faada Gaad, ahn pray fi mi faamli ahn mi fren dehn ahn fi mi konchri, eena Jeezas naym mee pray.