Ah memba wen Ah yoostu mek wreet fahn tailit paypa; now Ah dayr noh ways eevn wan singl pees!
Ah memba wen Shain Aiy Gyal "lip laik liva ahn shee waahn lipstik" bot now … no need, sayka faysmaas di kova lip!
Ah memba wen if yu doz laik "socially distant" yuself, dehn mi waahn sen yu fi si saikalajis; now, ih beta yoo deh da Toleedo ahn mee deh da Korozaal---nobadi feel "dis."
Ah memba wen if yu mi-di kaaf, nof pipl tel yu bowt tek honi ahn laim ahn tingz a dat mata. Now, wan lee kaaf, ahn pipl skyata!
Ah memba wen Faada doz beg wi kohn da Choch, dat yu sarows noh wahn laas; now Faada seh pray fahn hoahn ahn laiv schreem Maas.
Ah memba wen di "bump" mi rifer tu wahn daans er sohnbadi weh kech beli; now da di nyoo hanshayk. Ah memba da werk wen HR doz wach mi foni wen Ah waip mi han afta Ah mi greet kostomaz; now HR manaja di rosh fi gi mi hanzitaiza!
Ah memba wen di Hapi Bertday sang doz sing jos fi sohnbadi bertday; now da tee-dina-tee wi di sing bertday sang az wi wash wi han.
Ah memba wen pipl doz jreem bowt oan nais hows ahn kaa; now da ventilayta di star! (bai Silvaana Udz)
Neks week da Paat 3, "Ah Memba Wen"... stay sayf!