Tink bowt dis: Bileez Kriol pahn Wikipedia! Az wi mi tel unu bifoa, Bileez Kriol di set op wahn Wikipedia websait. Wi mi don shyaa wid unu sohn a di ting dehn wi di put op. Tudeh day, wi di shyaa weh wi di put op az di “Inchrodokshan” eena Kriol langsaid di Inglish chranslayshan. Wen nof ting don chranslayt, wi wahn shyaa di web link.
KRIOL: Inchrodokshan bowt Bileez
Bileez ga 22,800 kilomeetaz a lan (8,800 sq. mi), ahn sins 2015, 368,310 peepl. Eena Senchral Amerika, Bileez ga di smaalis nomba a peepl fu evri mail a lan. Di konchri di groa bai 1.87% evri yaa (2015), ahn dis da di sekan bigis eena di reejan ahn wan a di bigis eena di Westan Hemisfyaa. Bileez da wahn impoatant plays eena di sens a di werl vyoo bowt di “Mesoamerican Biological Corridor.” Bileez ga lata difrant peepl ahn kostom eena ih sosaiyiti, plos lata langwij, ahn dis aal da paat a di rich hischri a Bileez.
Wen yu tink bowt Bileez, yu tink bowt it laik Sentral Amerikan plos Kyaribeeyan, ahn ih ga schrang kanekshan wid di too reejan dehn. Bileez da wahn memba a di Kyaribeeyan Kamyooniti (CARICOM), di Kamyooniti a Latin Amerikan ahn Kyaribeeyan Staytz (CELAC), ahn di Sentral Amerikan Intigrayshan Sistim (SICA). Bileez da di oanli konchri fu bilangz tu aal chree a dehnya aaganizayshan. Pahn tap, Bileez deh eena di Kamanwelt, wid Kween Ilizabet II az di kween ahn hed a stayt. Peepl noa Bileez fu ih Semtemba salibrayshanz, ih lata koaral reef, ahn punta myoozik.
ENGLISH: Introduction about Belize
With 22,800 square kilometres (8,800 sq mi) of land and as of 2015 a population of 368,310, Belize has the lowest population density in Central America. The country's population growth rate of 1.87% per year (2015) is the second highest in the region and one of the highest in the Western Hemisphere. Belize's abundance of terrestrial and marine species and its diversity of ecosystems give it a key place in the globally significant Mesoamerican Biological Corridor. Belize has a diverse society, composed of many cultures and languages that reflect its rich history.
Belize is considered a Central American and Caribbean nation with strong ties to both the Latin American and Caribbean regions.[9] It is a member of the Caribbean Community (CARICOM), the Community of Latin American and Caribbean States (CELAC), and the Central American Integration System (SICA), the only country to hold full membership in all three regional organizations. Belize is a Commonwealth realm, with Queen Elizabeth II as its monarch and head of state. Belize is known for its September Celebrations, its extensive coral reefs, and punta music.
Di Kriol Kongsl tank Mista Vicente Costalago fu dis aidyaa ahn aal di werk hihn di du!
Silvaana Udz, Ed.D da fahn Bileez. If yu waahn tel shee bowt sohnting speshal fu put eena dis Kriol aatikl, eemayl: [email protected] or Vizit: www.nationalkriolcouncil.org