Yu ku bileev it? Aypril don. Neks mont May di kohn. May mont: hmmm…mek Ah tink. Tudeh day da noh jos Maypoal hapm eena May mont (ahn wid koroanavairos stil di shub op ihself bowt di plays, nat eevn Maypoal mait di hapm da vilij dis yaa agen.) Wid May di bos rong di kaana, wi staat fi tink alredi bowt schrang weda ahn harikayn. Mee noa seh dat di ofishal harikayn seezn da Joon tu Novemba, bot dehnya dayz, wi don di staat si now dat sohn lee harikayn laik pap op fahn eena May. Da laik harikayn di mikays kohn kwik kwik dehnya dayz. Da klaimit chaynj di mek aal a dis hapm, er da soh mee di hyaa sohn weda man ahn sohn weda uman seh. Now chek owt soh neks ting weh hapm er salabrayt eena May mont rong di werl:
May 3: Day fi Laaf (Spen dis day di smail op ahn fain ting weh mek yu laaf!)
May 3 - 9: Week fi Tink Bowt di Son (laik how hat hat hat di son ku geh)
May 3 - 9: Week fi Chrai Noh Yooz Skreen (Chrai stap di skroal pahn selfon)
May 5: Wi aal noa dis wan: "Cinco de Mayo" weh Spanish pipl (eena Bileez, Mesteeso, Maiya, ahn aal a wi reeli noa bowt dis day)
May 9: Madaz Day. Eena Bileez ahn aal oava di werl, wi salabrayt mama!
May 12: Day fi Salabrayt wi Ners Dehn (Dehn tek kyaa a wi gud gud-wan!)
May 20: Day fi Salabrayt Beez (yes, dehn bee weh laik di boz rong, ahn sohn ku sting yu, bot dehn mek sweet sweet honi tu!)
May 23: Wel Tertl Day (Maybi eena Bileez da "Werl Bokotoara Day")