Nof pipl rait poayem ahn sang ahn chribyoot tu di layt, grayt Leela Vernon, Kween a Buru Brokdong, Kween a Bileez Kriol kolcha (Aktoaba 21, 1950 – Febiweri 19, 2017). Laas week wi mi shaya wahn chribyoot weh Leela kozn Maelyn Longsworth O’Brien mi rait. Dis week, wi di shyaa wahn neks poayem. Dis da wan weh wahn neks grayt Kriol kolcha laydi, Myrna Manzanares, mi rait ahn mi shyaa da Leela fyooneral. Tank yu, Myrna, fu aal yu kip di du!
Nobadi els dehn pahn dis ert laik yoo, Leela
Nobadi else weh put fu dehn myoozik
Ahn dehn kolcha way way op da tap laik yoo, gyal.
If oanli adaz mi gat fu yoo pashan ahn lov
Fu dehnya tingz weh shoa yu oan chroo chroo self—kolcha.
Noh mataz if yu da Kriol, Mestizo, Garifuna, Maya, East Indian,
Er eni ada kolcha eena wi konchri
Den Bileez wuda kohn tugeda fu chroo, ahn wi nayshan wuda geh nof blesin,
Ahn eech kolcha groop wuda ga fu dehn karek plays … fahn di batam a mi soal … Ahn rispek eena dis konchri.
Ah noa how moch yu lov op yu kolcha ahn yu myoozik, Leela
Ahn how moch yu mi soh chrezha yu Mayan mikscha,
Bot yu mi chooz fu aidentifai wid yu Afrikan ansestaz
Sayka yu mi noa seh how impoatant dis fu di Bileez Kriol.
Ahn wi aal moch beta sayka dis.
Yoo da wahn Bileezhan tu di boan, tap a di tap, Leela, ahn laik Mista Peetaz,
Yu wahn liv eena wi haat ahn main fareva,
Ahn wi wahn memba yu fareva az paat a wi rich kolcha ahn myoozik heritij
Weh wi wahn neva stap salibrayt.
bai: Myrna Manzanares
Silvaana Udz, Ed.D da fahn Bileez. If yu waahn tel shee bowt sohnting speshal fu put eena dis Kriol aatikl, eemayl: [email protected] Vizit: www.nationalkriolcouncil.org