Geh Redi... Feel di Jrom di Beet!

Hoo ku eva figet di layt grayt Andy Palacio? Hihn du soh moch fu mek faymos lata Garifuna myoozik ahn lat bowt Garifuna kolcha pahn tap. Memba seh dat Andy Palacio da-mi aalso wahn grayt teecha, wahn EJUKAYTA. Ahn hoo ku eva figet di layt grayt Mista Paul Nabor? Sayka dehn, ahn adaz laik dehn, Garifuna kolcha, langwij, ahn speshali di myoozik, wahn neva eva ded owt. Di "Garifuna Collective," Penn Cayetano, Aurelio Martinez (hoo evribadi da Bileez noa!) ahn lata ada grayt pipl di kip op di Garifuna myoozik ahn kolcha ahn langwij schrang schrang...wid nof rispek tu di Nashanal Garifuna Kongsl.

 

Tap a evriting, da di Garifuna jrom. Maybi da moasli punta yoo shofl yu foot tu ahn moav yu badi eena di speshal punta moavment. Er maybe yoo ku daans wanaragwa... er maybe da di chumba da yu ting. Sohn a di Garifuna myoozik link op tu tingz pipl du eena evriday werk laif; ada a di myoozik da fu play; ada myoozik da fu wen da taim fu gi prayz er eena speshal serimoni. Di too speshal jrom da di "primero" jrom (di tena [tenor] jrom) ahn di "segunda" jrom (di bays [bass] jrom.

 

 

Dis mont, wi di salibrayt Garifuna Setlment Day... mek shoar yu jain eena di fon ahn prayz. Di Nashanal Garifuna Kongsl ga nof ting weh yu ku tek paat eena. Fain wan er too er moa ahn salibrayt! Plos nof hudut... nais nais hudut wahn deh rong di 19t, so mek shoar yoo geh yu playt!

 

 

Yu redi? Geh redi... 19t di kohn!

 



Brought to you by the:



Kriol is the language spoken by many Belizeans, especially the Creole people of Belize. Although it is often perceived as a dialect of English, it is indeed it's own language with grammar and spelling rules. The National Kriol Council of Belize was created to promote the culture and language of the Kriol people of Belize, as well as harmony among all the ethnic groups of Belize. Please visit the website of the National Kriol Council of Belize for lots of good information about the Kriol language and the Creole people.


The Kriol Council has been kind enough to send us the weekly "Weh Wi Ga Fi Seh" column that is usually published in the Reporter.


Check back weekly for new articles.


Latest Posts