Dis da fahn Maelyn Longsworth O’Brien. Shee da faamli wid Leela Vernon faamli. Shee rait dis chribyoot tu wi Bileezhan Kriol kolcha kween. Wi tank Maelyn fu shyaa dis wid wi.
Wel Leela, luk how yu mikays gaan, eh gyal?
Wi neva did finish taak bowt di Kriol Day weh wi waahn soh bad.
Ahn di nyoo sang weh Juliet ahn Tito rikaad.
Madaz! Yu mosi mi reeli taiyad bad.
Eevn doa yu eena sayfa hanz now, wi stil fain it kaina haad.
Bot He gat wahn biga jab op deh fi yu, soh wi noh kweshan Maasa Gaad.
Dats wai wi sen yu aaf eena wahn gud frak ahn wahn maik eena han,
Soh az yu get op deh, yu hib ahn lang shoa ahn goh strayt goh jain di ban.
Bot wayt … yu deh rait eena kompni wid aal a yu pipl dehn.
Eevn wan er too a yu oal myoozishan fren.
Frahn Matta, Mario, ahn Mista Peetaz—rait dong tu yu kozn Sharon.
Wan big brokdong paati, eh! Soh wach yu di wap, wap ahn goh dong!
Wel, wi wahn salibrayt ahn aana yu rait ya da yu lee hoam tong.
Gyal, wan lata pipl kohn da PG fi di big shoa dong!
Dehn kohn seh gudbai ahn tank yu kaaz yu reeli did yu paat.
Yu da wahn chroo Kriol gyal, ahn yu wahn aalwayz eena wi haat.
Ahn dehn lata lovli sangz weh yu lef wid wi.
Ah waahn noa hoo seh wi wahn stap daans tu dehn? Gyal—chrai fi mi.
Wi wahn ding ding wala ahn hala sotay dehn hyaa wi lowd ahn klyaa:
Kriol fu gat dehn oan Day; laik yu doz seh, ih oanli fyaa.
Bot wi wahn taak bowt dat wahn neks taim, hyaa? Noh wori, wi wahn stay pahn di kays.
Kungo mek wi goh lay yu dong now ahn chrai get owta dis plays.
Wi wahn mis yu, Leela gyal, speshali yu pikni dehn.
Gudbai pet; goh res eena pees sotay wi si yu agen.
bai: Maelyn Longsowrth O’Brien
Silvaana Udz, Ed.D da fahn Bileez. If yu waahn tel shee bowt sohnting speshal fu put eena dis Kriol aatikl, eemayl: [email protected] Vizit: www.nationalkriolcouncil.org