Enibadi fahn Bileez weh mi-deh rong eena di 1970s, 80s, ahn 90s noa bowt "dudu daalin" ahn dehn speshali noa dat da-mi di layt grayt laydi, di Bileezhan Bev Smith, hoo mi mek dis Kriol frayz faymos. Miz Bev, wi doz kaal ahn. Wi mi soh sad sad wen shee mi gaahn lang tu Faada Gaad. Jos laik tudeh day wi memba agen di layt grayt Kriol laydi Miz Leela, Leela Vernon, hoo gaahn lang disya sayhn yaa 2017, ahn hoo uda mi-di salibrayt bertday dis Aktoaba mont. Dehn mosi don meet op eena Hevn, langsaid Bra Peet, di layt grayt Mista Peetaz... ahn hoo ku eva figet Mista Paul Nabor... di layt graty Garifuna man. Az Leela doz aalwayz tel wi, Kriol ahn Garifuna ga lat eena kaman, noh main wi doz laik kwaaril op eena di paas! Dis mek Ah memba di poayem bai Bileezhan Philip Lewis, "Ah Tink Ah Si Wahn Nyoo Bileez." Eena datideh poayem, Mista Philip Lewis mi-di taak bowt how hihn si wahn Bileez weh aal di difrant kolcha dehn kohn tugeda ahn rispek eech ada. Sins datideh taim wen hihn mi rait dat, lat a nalij deh rong bowt Kriol, Garifuna, Maya, Mestizo ahn aal a wi hischri az wan Bileez Dis da gud gud ting. Paat a di poayem goh laik dis:
Ah Tink Ah Si Wahn Nyoo Bileez
Weh di Kriol, di Mestizo, di Garifuna, ahn di Maya
Not deh sepret, bot deh tugeda az wan--Bileezhan.
I think I see a new Belize
Where the Creole, the Mestizo, the Garifuna, and the Maya
Are not separated, but united as Belizeans.
Eech etnik paat a di Bileezhan kolcha impoatant; tugeda, aal mek Bileez di Bileez wi noa!