Da mi eena 2011 dat di layt Leela Vernon mi bring owt di Bileez Nashanal Antem eena Kriol. Eena di Aagas 22, 2011 “Weh Wi Ga Fi Seh” wi mi gi unu di liriks. Tudeh, wi di bring dat bak, fu aana di layt, grayt Leela Vernon. Fu si ahn hyaa wahn hoam rikaadn a Leela di sing dis sang pahn YOUTUBE. Di Kriol antem mi rikaad bai Leela, lang wid Emmet Young ahn Henry Martinez III, ahn dehn deh pahn di veedyo tu. Di chranslayshan fahn Inglish tu Kriol da mi bai Leela Vernon, Silvaana Udz, David Obi, Myrna Manzanares, ahn Yvette Herrera.
O, lan a di free bai di Karibyan See Wi korij wi plej fi mek yoo free No tairant kyaahn stay ya; unu enimiz hafu goh Fahn disya peesful plays a demakrasi. Di blod a wi ansestaz weh mi bles disya grong Mi kaaz wee fu free, ahn nohmoh slayv wi wahn bee. Bai di mait a chroot ahn di grays a Gaad Mi kaaz wee fu free ahn nohmoh slayv wi wahn bee.
Koaros: Get op – unu disendants a di Baymenz klan Put aan unu aama ahn difen disya lan Jraiv bak dehndeh tairant; unu enimiz hafu goh weh Fahn disya lan a di free bai di Karibyan See.
Naycha mi bles wi wit inof richiz Wit aal wi mongtinz, valiz ahn raynfares preshos chree Wi ansestaz, di Baymen, brayv ahn schrang Put aan unu aama ahn difen disya lan. Fahn prowd Rio Hondo tu oal Saastoon Chroo aal dehn koaral ailanz, oava bloo lagoon Kip wach wid dehn aynjalz, di staarz ahn di moon Fo freedom wahn kohn sotay tumaaro aftanoon.
(Ripeet Koaros)
YES! Di kween a Bileez Kriol kolcha myoozik, LEELA VERNON lef wi lata ting fu mek wi prowd a wi Kriol kolcha! Nof rispek tu Laydi Leela ahn tu ih faamli. Gaad bles.
Silvaana Udz, Ed.D da fahn Bileez. If yu waahn tel shee bowt sohnting speshal fu put eena dis Kriol aatikl, eemayl: [email protected] or Vizit: www.nationalkriolcouncil.org