Dis Septemba 21, Bileez ton 40. Hapi Bertday tu wi konchri. Bot da how fi salabrayt disya 40 yaaz? 40 yaaz da wahn big big bertday. Bot wid koroanavairos now eena ih sekan yaa, di kaaz mizri ahn kanfyoozhan, da how fi salabrayt?
Wel, fos ting: 2021 lee bit beta dan 2020 wen ih kohn tu how wi ku deh owt an abowt. Bot hoal op—noh di deh aal oava di plays! Di koroanavairos don chaynj op ahn ga difrant wayz a mek wi sik. Sayhn way, doh, wi ga vakseen now. Wid di vakseen, ih luk laik wi noh geh az sik az widowtn di vakseen.
Bot di ting da dis: Sohn pipl stil frayd, er di tink dat dehn noh need fi tek no vakseen. Sohn di seh dat dehn noh noa weh deh eena di vakseen. Da dats mek wai sohn pipl frayd fi tek di vakseen. Bot pet, eevn wen dakta tel yu weh deh eena di vakseen, da noh laik yu wahn noa da wat!
Adarels pipl weh noh waahn tek di vakseen seh how Faada Gaad wahn protek dehn. Dehn seh dat Faada Gaad sen di vairos, soh da Faada Gaad wahn tek weh di vairos if yu bileev eena Faada Gaad. Bot pet, memba seh dat da Faada Gaad gi di dakta dehn di braynz fi kohn op wid di vakseen fi di vairos! Soh, mek sens owta naansens: TEK DI VAKSEEN. Pahn tap, sotay aal a wi tek di vakseen, non a wi wahn ku geh bak tu wi laif, sayka di koroanavairos smaat smaat ahn noa fi fain dehnya pipl weh noh vakseen. Soh da dehn di mek datideh koroanavairos kantiyu chaynj op ihself ahn kantinyu mek pipl wayk op ded. Soh, mek sens owta naansens: TEK DI VAKSEEN.
Yu feel laik jomp op ahn dong fi salabrayt Bileez Indipendans 2021?
Du soh eena yu hows, sayf-wan wid yu famili. Maybi yu ku ga Zoom paati wid yu ada faamli dehn, ahn wid fren ahn kompni.
Hapi Bertday Bileez!