Belize Da Fi Wi Now and Forever, 8867

Evri yaa, di Nashanal Salibrayshan Komishan ga wahn kantes fi wahn sloagan
(wahn sayin) fi goh wid di Septemba salibrayshan.  Dis yaa, di komiti chooz di
sayin “Belize Da Fi Wi—Now and Forever, 8867.” Da wahn laydi fahn Korozaal
hoo win di kantes dis yaa. Ih nayhn Fernanda Tun. Wi gi big kangrats tu Fernanda
Tun, ahn wi soh hapi fi si how ih yooz di karek Kriol spelin eena di Kriol paat a di
sayin weh seh “da fi wi.”  Eena aal Kriol, di sayin uda goh: Bileez da fi wi now ahn
fareva, 8867. Eena aal Inglish, di sayin uda goh: Belize is ours now and forever,
8867 (or) Belize is for us now and forever, 8867.


                                        Da fi wi = 
                              It is ours; It is for us.


Di wina, Fernanda Tun, put di saying paatli eena Inglish ahn paatli eena Kriol. Wi
reeli seh big tenk yu tu Fernanda Tun fi yooz di karek Kriol spelin fi di Kriol paat!
Dis yaa, di Komishan ripoat dat 196 difrant sayin mi geh sen een fahn wahn total
a 70 difrant pipl. Di roolz da-mi dat yu kuda-mi sen een op tu ten difrant sayin
fahn wan persn. Pahn tap, di sayin kuda ga op tu ten werd, bot no moa dan 10.
Az lang az yu da Bileezhan, yu kuda-mi enta di kantest. Ih neva mata if yu di liv
da Bileez rait now er if yu di liv da faren … jos hafu bee wahn Bileezhan!
 

Soh… di konkdong tu Septemba Salibrayshanz 2018 don bigin now! Geh redi …
geh redi … geh redi fi mek wi salibrayt aal 8,867 skwayr mailz a Bileez … sayka dis
big reezn: Bileez da fi wi now ahn fareva!

Silvaana Udz, Ed.D da fahn Bileez. If yu waahn tel shee bowt sohnting speshal fu put
eena dis Kriol aatikl, eemayl: [email protected]          Vizit: www.nationalkriolcouncil.org



Brought to you by the:



Kriol is the language spoken by many Belizeans, especially the Creole people of Belize. Although it is often perceived as a dialect of English, it is indeed it's own language with grammar and spelling rules. The National Kriol Council of Belize was created to promote the culture and language of the Kriol people of Belize, as well as harmony among all the ethnic groups of Belize. Please visit the website of the National Kriol Council of Belize for lots of good information about the Kriol language and the Creole people.


The Kriol Council has been kind enough to send us the weekly "Weh Wi Ga Fi Seh" column that is usually published in the Reporter.


Check back weekly for new articles.


Latest Posts