Ah memba wen Ah yoostu wyaa faysmaas jos fu Haloween; now faysmaas mek mee eekwal tu di kween!
Ah memba wen hyaa braydaz doz fait op fi kostomaz da Tooris Vilij; now eevn Taam, Dik nar Hari goh deh fi pilij.
Pahn tap, noh mata how bad tingz geh da yu yaad
Luk op wan lee minit ahn tank di gud Laad.
Jos imajin lakdong widowtn kaybl TV ahn Wi-Fi
Now datideh sichuyashan uda mek yu baal, noh jos krai!
Soh jrap tu yu neez, ahn tank Faada Gaad fi di laif yu stil gat.
Mikays fi goh no plays; yooz di taim fi fiks op yu lee dis ahn dat.
Laan fi eksasiz eena yu kichin spays, yu varanda, ahn yu bed
Ahn pray fi di soalz a wi breda ahn sista weh di wayk op ded.
Wat a ting -- dis koroanavairos bizniz! Taim fi hib ahn lang shoa!
Mikays weel ahn ton agen, 2020—Ah di shoa yu di doa!
(bai Silvaana Udz)
Wi hoap unu mi injai "Ah Memba Wen" wich wi mi shyaa eena 3-paat (April 24, May 1, ahn tudeh). Tu aal di dakta, ners ahn helt pipl, aal di janita ahn sanitayshan pipl, aal hoo di provaid food ahn servis: TENK YU. Stay sayf evribadi! Mek wi aal du wi paat fi hib disya vairos lang shoa. Mek wi stap di bait op bowt ting weh noh mata moch, ahn gi tanks fi faamli ahn fren ahn konchri. Gaad bles wi leeda dehn hoo di du dehn bes fi help wi, govament ahn apozishan. Ahn wi pray tu Faada Gaad fi help wi geh chroo dis.