2017 Krismos - Yu Redi?

Disya taim a di yaa da fu chree ting eena Bileez: kleen op hows fahn tap tu batam, geh tugeda wid faamli ahn fren, ahn prayz Jeezas moa. At lees wi hoap seh evribadi memba seh dat Jeezas da di reezn fu disya seezn! Laas yaa dehnya taim, wi mi shyaa sohn a di ting dehn weh oal-taim Bileez pipl doz laik du rong Krismos taim. Wi bring bak sohn a dehn tudeh, langsaid soh nada ting wi memba seh dat wi di du tudeh day, ting weh wi hoap lata wi yong pipl di du tudeh day az dehn staat op fu dehn oan faamli ahn help kip op Krismos, Bileez stail!

 

  1. Tap a di lis da dis: Rip owt wi oal maali ahn put dong nyoo wan. Fu Krismos, evribadi laik noa seh dat dehn floaboad di smail... fu chroo!
  2. Wid nyoo maali, fu shoar yu wahn waahn kleen op di hows gud gud-wan. Waip dong di waal ahn spary waata haad haad pahn dehn doti skreen soh mek dehn geh kleen ahn breez bloa chroo gud gud-wan.
  3. Palish op wi priti priti boad fernicha! Ahn sohn a wi maita waahn paynt op di plays fu Krismos (Dis maita meen seh, laik di layt Mista George Gabb doz seh, dat wi put paynt pahn oal boad…goh hed…paynt op!).
  4. Afta wi kleen, wi eet op! Soh wi soak wi froot dehn fu mek blak froot kayk ahn wait froot kayk. Den wi bayk ahn bayk ahn bayk … lait kayk tu! Sohn a wi pikni noh laik di froot kayk; dehn jos waahn lait kayk!
  5. Memba wi faamil ahn wi fren dehn. Bai er mek gif fu gi dehn, ahn moas impoatant: Mek taim fu deh wid dehn!
  6. Myoozik: brok dong! akaadyan, gitaar…lee jromz...brokdong! Ahn wi salibrayt as wi Garifuna Bileezhans kohn rong wid jankunu daans!
  7. Noh figet fu prayz Faada Gaad: Jeezas da di reezn fu di seezn!

 



Brought to you by the:



Kriol is the language spoken by many Belizeans, especially the Creole people of Belize. Although it is often perceived as a dialect of English, it is indeed it's own language with grammar and spelling rules. The National Kriol Council of Belize was created to promote the culture and language of the Kriol people of Belize, as well as harmony among all the ethnic groups of Belize. Please visit the website of the National Kriol Council of Belize for lots of good information about the Kriol language and the Creole people.


The Kriol Council has been kind enough to send us the weekly "Weh Wi Ga Fi Seh" column that is usually published in the Reporter.


Check back weekly for new articles.


Latest Posts