Bak eena Disemba and Septemba 2019, wi mi shyaa poayem bowt Krismos ahn bowt Septemba salibrayshanz fahn Mista Bunny Panting. Az wi mi tel unu, Mista Bunny gaahn lang now, bot Angelus Press mi poblish Mista Bunny poayem dehn eena 2008. Mista Bunny mi kohn tu mi bak den fi mi mek shoar di karek Kriol spelin mi geh yooz. Dehndeh taim, di Kriol dikshineri mi oanli jos kohn owt (eena Aktoaba 2007). Tudeh, wid Valentain (Vlalentaim) rait rong di kaana eena dis lov mont, wi shyaa disya wan fahn di layt Mista Edward “Bunny” Panting:
Dis Bizniz, bai di layt Mista Edward Bunny Panting
Dis bizniz bowt Valentain kanfyooz mi a lat.
Wee kalad pipl ga no kain a saynt laik dat.
How lovaz wan ga speshal day mee kyaahn tel.
Wi jos meet di gyal, shoa wi lov, di res wahn goh swell.
Bot sohn bubu weh waahn impoatant fu luk
Schraik op toari, tel neks bubu, den rait eena buk
Seh how bod wayt fu dis day bifoa dehn staat mayt,
Bot fu pik speshal day sohntaim kuda bi layt.
Speshali if di gyal luk reel gud tu di yaiy
Sohn ada neks bali kuh beet yu tu di praiz.
In fu mee schupid tinkin ah meet gyal tunait,
Ah mek mi advansiz rait away, yes dats rait.
Mee noh wayt fu no Valentain Day fu bigin.
Moav een rait now, goh hed, nak yu ting.
Bikaa if yu heng op, wayt fu Valentain
Yu mait goh krayzi, looz gyal, maybe even looz main. (di en)