Laik wi pramis laas week, wi di bring bak Step 1- 10: How Pipl Weh Geh Abyooz Ku Ripoat It hn Geh Help, wichin eena Inglish, dis da: Gender-Based Violence Referral Pathway. Di infamayshan da fahn di Dipaatment a Hyooman Servis ahn dehn paadna dehn. Wi tank dehn fi put it eena wi konchri langwij dehn, wichin Kriol da wan. Laas week wi mi bring bak Step 1~4. Tudeh, da Step 5 - 10, jos eena Kriol. Bak eena erli Novemba wi put di Inglish langsaid it.
Step 5: Di polees link op wid Uman & Famili Sopoat Servis Dipartment (fu Uman Abyoos) ahn Dipaatment a Hyooman Servis (fu Pikni Abyoos) fi geh wahn sayf plays fi stay (sayf spays) as dehn uda need. Pahn tap a dat, dehn ku geh help di taak owt dehn prablem wid profeshanal pipl fi help setl dehn main (geh kongsln) ahn dehn laif, laik geh help wid chranspoat tu di plays weh aafa dehnya servis.
Step 6: Di Sayf Spays Dehn: Fos ting da dis: Di Uman Dipaatment wahn divelop (wid di servaiva ahn ih famili) wahn plan fi tek kyaa a dehn fi wahn lee wail (shaat-term plan). Di neks ting da fi kehr di servaiva (er aal di servaiva dehn) da di sayf plays fi stay fi da lee wail.
Step 7: Di servaiva dehn ku jos shoa op da di instityooshan dehn weh aafa plays fi stay ahn help fi setl dehn main ahn laif, er fi ripoat eni prablem weh dehn ga wid di protekshan a dehn pikni.
Step 8: Help fi Setl Yu Main ahn Laif: Di Dipaatment wahn kohn op wid wahn way fi help di servaiva dehn ahn wahn plan weh wahn ku help dehn oava wahn langa peeryad a taim. Pahn tap a dat, di Dipaatment wahn help di famili fi fain wayz fi mek sohn moni soh dat dehn ku get bak pahn dehn fut.
Step 9: If di servaiva dehn di geh help wid wahn sayf plays fi stay ahn mental helt, ahn dehn need chranspoat fi goh da koat pahn dehn koat dayt, den di Uman Dipaatment wahn kehr dehn.
Step 10: Polees: Di polees help di servaiva fi mek wahn prapa staytment, er ripoat, er if ih waahn pres chaaj gens di persn weh abyooz ahn.
[En a di mesij]