Wi bring bak... now eena jos Kriol
Dis week ahn neks week, wi bring bak Step 1 - 10 a di infamayshan fahn di Dipaatment a Hyooman Servis ahn dehn paadna dehn bowt "How Pipl Weh Geh Abyooz Ku Ripoat It ahn Geh Help." Fu di paas week dehn, wi mi shyaa dis eena Kriol, langsaid di Inglish chranslayshan. Dis taim, wi jos di put it eena di Kriol, soh yu ku chek owt how gud yu gud di reed Kriol! Memba, eena langwij, yu chranslayt meenin, noh jos werd-bai-werd. Laik: How Pipl Weh Geh Abyooz Ku Ripoat It ahn Geh Help da eena Inglish Gender-Based Violence Referral Pathway.
Step 1: Di servaiva ku kaal 0-800-A-WAY-OUT er 911. Wahn polees aafisa er wahn aparayta wahn ansa 24/7 (aal day ahn aal nait), den di polees wahn vizit di plays weh di prablem deh, ahn kehr di servaiva da stayshan, if di servaiva waahn goh. Polees wahn hoal di wan weh di du di abyoos tu, if ih dehdeh. Di polees aafisa dehn wahn sopoat di servaiva dehn weh goh da di stayshan pahn dehn oan tu.
Step 2: Di fos step fi mek pipl weh geh abyooz geh help eena dis way, da fi mek dehn goh goh aks di Koat fi gi aadaz fi mek dehn geh protekshan fi wahn lee wail ahn wahn plays fi dehn stay. Di servaiva dehn ku du dis bifoa er afta dehn lef di Polees Stayshan er afta dehn lef di shelta.
Step 3: Haaspital: Evriting weh mi hapn wahn hafu geh rait dong. Di servaiva dehn wahn ku geh medikal help aal oava di konchri. Fi di Senchral Helt Reejan, dehn wahn sen di servaiva dehn da KHMH**, MRPCP**, an PLHC**.
Step 4: Di Servaiva Hows: Di servaiva dehn ku geh help fi moov dehn bilanginz ahn impoatant paypaz fahn dehn hows if dehn waahn lef dehn hows. Pahn tap a dat, dehn ku geh sopoat if dehn waahn polees chaaj di persn weh abyooz dehn (di abyooza). Dis inklyood if di abyooza mi brok eni protekshan aada weh di Koat mi gi. [Neks week, Kriol fi Step 5-10]