Valentain…Valentaim: Injai!

Sohn peepl seh “pipl” fi di Inglish werd “people.” Ahn sohn seh “pipl.”Di too way karek. Jos laik sohn pipl seh “skejool” ahn sohn seh “shedyool” eena Inglish fi “schedule.” Ah noa dat wid “schedule” da British er Amerikan way fi seh, bot eeda way, da Inglish!  Sayhn ting di goh aan wid “Valentine.”  Eena Kriol, ih karek fi seh it “Valentain” er “Valentaim.” Wel, mataz bee!  Eeda way yoo seh it, wi hoap yu injai dis 2020 Valentaim Day! Noh mata if yu ga Valentaim dayt er nat. Noh mata wat, yu ku lov op yuself! So, how yu ku shoa yuself sohn lov? Chek owt dehnya foa ting dehn yu ku du. Ahn yu ku du dehnya ada day tu, noh jos tudeh! Bowt too yaaz abak wi mi shyaa faiv ada tingz yu ku du, soh tudeh wi ad foa moa!

 

1.  Aalwayz memba fi sloa dong ahn smel di flowaz. Maybi yu maita noh geh no flowaz dis Valentaim Day. Maybi yu maita noh gi no flowaz eeda. Bot aalways stap fi smel da red bel.  
2. Memba da nais hyaakot yu mi aalwayz waahn doz get? Er da nais nais nais jres er pants? Now da di taim fi chreet yuself! Bai yuself yu oan Valentaim gif!
3. Kuk op wahn speshal dish fi yuself. Er invait wahn 2, 3, 4, er 5 fren fi kohn eet wid yu. Di ting da fi injai di kuk op—noh tink az it laik werk. Put lov eena di pat!
4. Di fos persn yu si tudeh, smail wid ahn: wahn big big smail weh split yu fays fahn kaana tu kaana! Ahn tank Faada Gaad fi dis day!
 

Hapi Valentain … Hapi Valentaim 2020!



Brought to you by the:



Kriol is the language spoken by many Belizeans, especially the Creole people of Belize. Although it is often perceived as a dialect of English, it is indeed it's own language with grammar and spelling rules. The National Kriol Council of Belize was created to promote the culture and language of the Kriol people of Belize, as well as harmony among all the ethnic groups of Belize. Please visit the website of the National Kriol Council of Belize for lots of good information about the Kriol language and the Creole people.


The Kriol Council has been kind enough to send us the weekly "Weh Wi Ga Fi Seh" column that is usually published in the Reporter.


Check back weekly for new articles.


Latest Posts