Memba aal dehn “Nak nak” joakz wi groa op wid? Yu memba, rait? Da too
pipl weh di taak. Di fos wan seh, “Nak nak.” Di sekan wan showt owt di
kweschan, “Hoo dat?” Di fos wan ansa wid wahn naym, den di sekan wan
aks “(fos naym) hoo?” Di fos wan ansa bak wid di nak nak joak, weh mek op
bai di ton di fos naym into sohnting joaki! Soh, tudeh, wi ga sohn Kriol nak
nak joaks fi bring unu wahn gud laaf!
#1: Nak nak! #2: Hoo dat?
#1: Chroodi #2: Chroodi hoo?
#1: Chroo di doa di man gaahn wen di hozban kohn hoam!
-----
#1: Nak nak! #2: Hoo dat?
#1: Hari #2: Hari hoo?
#1: Harikayn mont deh ya! Mek shoar yu redi fi kech hai grong!
-----
#1: Nak nak! #2: Hoo dat?
#1: Kali #2: Kali hoo?
#1: Kalifornya da weh sohn Bileezhan gaahn chroo di bak!
-----
#1: Nak nak! #2: Hoo dat?
#1: Maak #2: Maak hoo?
#1: Maak mi dong fi chree baa-bi-kyoo tikit. Ah sopaot yu kaaz.
Silvaana Udz, Ed.D da fahn Bileez. If yu waahn tel shee bowt sohnting speshal fu put eena dis Kriol
aatikl, eemayl: [email protected] Vizit: www.nationalkriolcouncil.org