Wel…unu noa seh dat harikayn seezn deh ya. Tingz eena di Atlantik Oashan di
bobl ahn bail. Tenk gudnis, op tu di taim a dis aatikl raitn, no staam kech wi yet
da Bileez fi dis 2018 Harikayn Seezn. Bot wi mosn let dong wi gyaad. Wi mos
aal mek shoar wi redi redi if harikayn kohn vizit wi. Wi seh vizit, bot wi noa seh
dat harikayn noh jos visit—no way! Wen harikayn kohn, ih laik kohn krash op
wi plays, ahn sohntaihn brok op wi plays bad bad. Harikayn da noh nais vizita,
no taal!
Eena Bileez ahn di Westan werl, wi kaal dehnya big big staam “harikayn.”
Eena di Inglish langwij, da “hurricane.” Eena Ayzha, dehnya big big staam
nayhn “taifoon.” Eena di Inglish langwij, da “typhoon.” Eena ada plays, dehnya
big big staam da “saikloan.” Eena di Inglish langwij, dis da “cyclone.”
Wel muma! Wel pupa! Kaal it weh yu waahn, bot wan ting da di sayhn wid
harikayn, taifoon, er saikloan! Dehn da notn fi play wid, so mek shoar yoo ahn
yu faamli ga harikayn plan shud-in-kays harikayn kohn da Bileez dis yaa! Wi
shyaa di harikayn nayhn dehn fi di 2018 seezn, eena Inglish ahn eena Kriol:
2018 Atlantik Harikayn Seezn
Alberto (Bayto) Helene (Helin) Oscar (Oskah)
Beryl (Beril) Issac (Aizak) Patty (Pati)
Chris (Kris) Joyce (Jais) Rafael (Rafahyel)
Debbie (Debi) Kirk (Kerk) Sarah (Saarah)
Ernesto (Nesto) Leslie (Lesli) Tony (Toani)
Florence (Florens) Michael (Maikl) Valerie (Valari)
Gordon (Gaadn) Nadine (Nadeen) William (Wilyam)
Silvaana Udz, Ed.D da fahn Bileez. If yu waahn tel shee bowt sohnting speshal fu put eena dis Kriol aatikl,
eemayl: [email protected] Vizit: www.nationalkriolcouncil.org