Yes! Reed Di Nyoo Testiment eena Kriol Fu Free!

Laas week, Ah mi tel unu how mi fren Johanna da Stayts mi share wahn lee prayaa eena Kriol da di choch shee goh tu oava deh. Den wi mi tel unu dat memba yu ku lisn tu di Nyoo Testiment eena Kriol fu free pahn Bible.Is

 

Dis week, wi di tel unu dat memba yu ku reed di Nyoo Testiment eena Kriol fu free tu! Dis da di link fu Scripture Earth.

 

“Di Nyoo Testiment da di sekant paat a di Baibl. Di fos paat da di di Oal Testiment weh tel wi how Gaad mek di werl, ahn ih tel wi bowt di agreement weh Gaad mi fos mek wid ih peepl dehn, ahn bowt ih pramis tu dehn. Ih mi pramis dat ih mi wahn sen di Mesaiya (er Krais) az wahn king weh mi wahn sayv dehn. Di Nyoo Testiment tel wi how dehn pramis deh kohn chroo, ahn ih tel wi dat Jeezas da di Mesaiya. Di Nyoo Testiment eksplayn di nyoo agreement weh Gaad mi fos mek wid ih peepl dehn. Ih tel wi di Gud Nyooz bowt how Gaad pramis fi sayv evribadi weh put dehn fayt eena Jeezas Krais az fi dehn Laad ahn Sayvya.

 

Di Nyoo Testiment ga tweni-sebm buk eensaida it, ahn ih mi tek bowt twelv difrent man bowt fifti yaaz fi rait it. Aldoa yu mi ga difrent peepl weh rait di buk dehn, di mesij weh dehn rait da di saym. Di fos foa buk dehn tel wi bowt di laif a Jeezas Krais pahn di ert. Di Aks a di Apasl Dehn tel wi bowt how Gaad sen di Hoali Spirit, ahn how di cherch mi staat, ahn how ih bigin fi spred aal oava di werl. Den yu ga tweni-wan leta weh di apasl dehn rait tu di cherch dehn fi eksplayn how peepl weh bileev eena Jeezas shuda liv. Di Revilayshan da di laas buk eena di Nyoo Testiment, ahn ih tel bowt di vizhan weh Gaad gi di apasl Jan. Da vizhan tel bowt di laas dayz wen Jeezas wahn kohn bak tu ert.”

 

-Fahn di INCHRODOKSHAN



Brought to you by the:



Kriol is the language spoken by many Belizeans, especially the Creole people of Belize. Although it is often perceived as a dialect of English, it is indeed it's own language with grammar and spelling rules. The National Kriol Council of Belize was created to promote the culture and language of the Kriol people of Belize, as well as harmony among all the ethnic groups of Belize. Please visit the website of the National Kriol Council of Belize for lots of good information about the Kriol language and the Creole people.


The Kriol Council has been kind enough to send us the weekly "Weh Wi Ga Fi Seh" column that is usually published in the Reporter.


Check back weekly for new articles.


Latest Posts